غلام حضرت روغمن

غلام حضرت روغمن (زوکړه ۱۳۱۳ لمريز لېږدي کال، د ننگرهار ولايت - مړینه د ۱۳۸۶ ل ل کال د غويي مياشتې ۲۶) د افغانستان يو پښتو ژبی ليکوال او شاعر وو.

مخينه

لیکوال او شاعر غلام حضرت روغمن د فقیر محمد زوی او د حاجي عبدالهادي لمسی، پر ۱۳۱۳ ل ل کال د ننگرهار ولایت د کوز کونړ (ښېوې) ولسوالۍ د شگې د یاسین بابا په کلي کې په یوه دینداره او روښانده کورنۍ کې وزیږید. پر ۱۳۲۸ ل ل کال يې د سید جمال الدین افغان د ښوونځی څخه فارغ شو او پر همدغه کال په کابل کې د لیلیه اقتصاد په لیسه کی شامل شو. د لیليه اقتصاد لېسه چې د عبدالجيد زابلي له خوا تمویل کېده، د وخت حکومت له خوا تجزیه شوه او د ابن سینا په منځني ښونځي بدله شوه. نوموړی د دغې تجزیې په پايله کې له کابل ښوونتون (دارالمعلمین) څخه فارغ او پر ۱۳۳۴ ل کال د ابن سینا په منځي ښوونځي کې د ښوونکي په توگه وگومارل شو. وروسته يې بیا د افغانستان په بېلابېلو ولایتونو کې دندې ترسره کړې. لکه په ۱۳۳۸ ل کال د ننگرهار ښوونتون کې د ښوونکي په توگه وگومارل شو. پر ۱۳۴۰ ل کال د ننگرهار ولایت د ښوونې او روزنې ریاست پلټونکی وو. پر ۱۳۴۳ ل ل کال د کونړ ولایت د ښوونې او روزنې مرستیال وو. پر ۱۳۵۳ ل ل د روزگان ولایت د پوهنې لوی مدیر شو او پر ۱۳۵۱ ل ل کال نيمروز ولايت ته د پوهنې د لوی مدیر په توگه واستول شو. پر ۱۳۵۷ ل ل کال د ښوونې او روزنې وزارت د تالیف او ترجمې په ریاست کې د علمي او مسلکي غړي په توگه ومنل شو. په دغه ریاست کې یې د ۱۷ کلونو د خدمت په موده کې ۱۱۳ ټوکه پښتو درسي کتابونه د گران افغانستان بچو ته تالیف او تصحیح کړي دی. پر ۱۳۷۴ ل ل کال یې په خپله خوښه تقاعد واخیست.

غلام حضرت روغمن پر ۱۳۸۱ ل کال د ښېوې ولسوالۍ د خلکو له خوا بیړنۍ لويې جرگې ته د استازي په توگه وټاکل شو. استاد د خپل ژوند ډېره برخه د خپل هېواد د بچیانو په روزنه کې تیره کړه. هغه پر ښونیز ډگر سربېره په ادبي ډگر کې هم کارنده برخه درلوده.

مړينه

ارواښاد غلام حضرت روغمن د ۱۳۸۶ ل ل کال د غويي پر ۲۶ نېټه د ورپۍښې ناروغۍ له لامله له دې فاني نړۍ سترگې پټې کړې. اروا يې ښاده او جنت يې ځای شه.

چاپ شوي نښيرونه يې

چاپ شوی اثار یې دادي:

۱- روغمن ارمانونه.

۲- د ماشوم گلونه (د ماشومانو لپاره شعري ټولگه چې مطبوعاتي جایزه یې هم گټلې ده).

۳- تنکۍ هیلۍ (د نهو شاعرانو گډه شعري روزنیزه او ښوونیزه ټولگه، د محمد عثمان نژند په گډون).

۴- د لمر ترانې (د څلورو شاعرانو گډه شعري ټولگه.)

ناچاپ نښيرونه يې

۱- نړیوالې سولې ته لویه لار (شعري ټولگه).

۲- د ماشوم د ژوند لار (روزنیزه نثري ټولگه).

۳- د ښوونیزو او روزنيزو مقالو نثری ټولگه.

اخځليک

۱- روغمن، غلام حضرت، د ماشوم گلونه، د افغانستان د ليکوالو انجمن، د ۱۳۶۷ ل ل کال چاپ.

۲- د ښیوې ولسوالۍ د ځوانانو د تعلیمي مرکز فېسبوک پاڼه. ‎