سهیل خټک
سهیل خټک (زوکړه ۱۹۵۹ زېږدي کال، پښتونخوا ) د لوی افغانستان يو پښتو ژبی شاعر او ليکوال دی.
مخينه
سمولد ښاغلي سهیل خټک اصلي نوم سهیل بادشاه او د پلار نوم یې امیر خان دی، چې پر ۱۹۵۹ زیږدي کال د پښتونخوا د خټکو د کرک په سیمه کې یې دې نړۍ ته سترگې پرانیستې دي. ښوونځی او پوهنځی یې له ۱۹۷۶ ز کاله تر ۱۹۷۹ زیږدي کاله پورې د پښتونخوا د کرک په کالج کې تر ۱۴ ټولگي پورې لوستی او په قانون او پښتو ادبیاتو کې یې د ایم ای (ماستري) بری ليک یې پر ۱۹۸۴ زیږدي کال له پېښور پوهنتونه ترلاسه کړې ده.
سهیل خټک وایي چې د ۱۹۷۶ نه یې تر ۱۹۷۹ کاله پورې د ستر صوفي شاعر ارواښاد طاهر کلاچوي نه د تصوف په برخه کې زده کړه کړې او په پېښور کې د شعر او شاعرۍ په برخه کې یې د غزل د بابا ارواښاد امیر حمزه شینواري نه زده کړه کړې ده. ښاغلی سهیل خټک پر ۱۹۸۵ ز کال په پيښور ریډیو کې د پروډیوسر په توگه دنده ترلاسه کړه چې تر اوسه دغه دنده پرمخ بیا یي او د دې تر څنگ یو ناول لیکي او په تصوف کې یې د څیړنو اراده شته.
ښاغلي سهیل خټک یو مهذب او پر پښتو او پښتونوالې مین انسان دی.
د شعر بېلگې یې
سمولغزل
شهزاده چې تر بدها اورسېدلو - د خپل ځان تر انتها اورسېدلو
چې قيصه يې تر اخېره ولوستله - شک يې بيا تر ابتدا اورسېدلو
چې تدبير يې د هنر شو لاځوابه - عقيدت يې تر دعا اورسېدلو
يره هیله په هر زړه کې شوه راپورته - غږ د يرې تر بلا اورسېدلو
د تيارې په پټ رازونو چې پوه نه شو - پتنگ هله تر رڼا اورسېدلو
کوم دلال چې د هر چا خوله وتړله - بيا په چېغو تر باچا اورسېدلو
دا بې وسه د حساب نه دي سهېله! - چې تر گوره په سودا اورسېدلو
* * *
غزل د نس غم ته ماښامونه خرڅوي - يو وجود خپل اندامونه خرڅوي
چې له تېرو گناهونو توبه گير شو - اوس لگيا دي ثوابونه خرڅوي
د نړۍ په سياست کې سودا لوړه - ځېنې، ځېنې جنتونه خرڅوي
د شتمنو په مرگونه کوي شکر - اديرو کې چې گلونه خرڅوي
په شېبو کې گټه، گټه ورته ښکاري - وخت کې اوسي خو وختونه خرڅوي
څو ذهنونو د لالچ په بنسټ جوړ کړو - کوم قانون چې هېوادونه خرڅوي
غټ پېغور دي پښتنو ته دا سهېله! - خپل وطن کې خپل ځانونه خرڅوي
* * *
ليونتوب !
په جهان کې يو جمال شته - چې زما ورسره خيال شته
چې ورياد شم نو حېرت وي - په حېرت کې عقيدت وي
په دعا کې مې تل غواړي - چې زه نه يم ژاړي، ژاړي
په جهان کې يو جانان شته - په زمان کې يې مکان شته
په سندرو کې مې ياد کړي - په خبرو کې مې ياد کړي
د خپل حسن په رڼا کې - لټوي مې په دنيا کې
په جهان کې يو حسين شته - د سپوږمۍ رنگه جبين شته
لټوي مې لور په لوري - داسې تږي، تږي گوري
په خوبونو کې مې ياد کړي - منظرونو کې مې ياد کړي
په جهان کې يو دلبر شته - زما فکر کې هنر شته
زه يې هم يم په لټون کې - يادوم يې په ژوندون کې
چې په کوم وطن کې اوسي - خو د ځان خوا ته مې يوسي
کله وايم چې دا خوب دی ! - دا د مينې ليونتوب دی !
* * *
غزل سيند مستېدلو، ما څپې شمېرلې - ژوند ډوبېدلو، ما شېبې شمېرلې
عبادت شاته پاتې شوي و ډېر - نيت هېرېدلو، ما سجدې شمېرلې
ګناه اوده شوله په لوڅ وجود کې - ثواب راتللو، ما توبې شمېرلې
چا مرتبه د مجذوب هم راکړله - تسپې شلېدلې، ما دانې شمېرلې
د شطرنج لوبې کې وزير اوده و - چې ويښېدلو، ما مهرې شمېرلې
هنر مې تاو ته پېمانه جوړه کړه - اور بلېدلو، ما لمبې شمېرلې
سهېله! ځکه خو مستي شوه نېستي - هوش تښتېدلو، ما پيالې شمېرلې
چاپ شوي نښيرونه يې
سمول۱- ټپه ایز (د شاعرۍ لومړۍ ټولگه)، د ۱۹۸۴ زېږدي کال چاپ.
۲- خاموشۍ وکړې خبرې (د شاعرۍ دویمه ټولگه)، د ۲۰۱۲ ز کال چاپ.
۳- کړچ (نثر)، د ۲۰۱۸ ز کال چاپ.
ښاغلی سهیل خټک وایي چې ما په خپل شعري ټولگې ( ټپه ایز) کې په لومړي ځل دپښتو لنډیو ( ټپو) اود آزاد نظم تړون او اړیکي ثابت کړل او دلنډیو روح مې په آزاد نظم کې بیا ن کړی دی.
اخځليک
سمول۱- د ليکوال لطيف یاد فېسبوک پاڼه.