اېمل پسرلی
ايمل پسرلی (په انگرېزي: Emal Pasarlai) يو افغان پښتو ژبی ليکوال او خبريال دی. نوموړی په پښتو ژبه ليکوالي کوي او همدا راز د لنډو کيسو څو کتابونه يې چاپ شوي دي. د ليکوالۍ تر څنگ د بي بي سي د پښتو څانگې خبريال او وياند هم پاتې شوی دی.
مخينه
ايمل پسرلی د افغانستان په کندوز ولايت کې زيږيدلی دی. نوموړی د نامتو پښتون شاعر او اديب محمد صديق پسرلي زوی، د پښتنو کيسه ليکوالو اسد الله غضنفر، اجمل پسرلي او د آزادۍ راډيو د خبريال او ليکوال عصمت الله څاروان ورور دی.
زده کړې
ايمل پسرلي د کوشنيتوب دوره په کندوز کې تېره کړې او لومړني دوه ټولگې يې په کابل کې لوستي دي. ده د پېښور له پوهنتونه د لسانس سند اخيستی دی. د نوې مېډيا په نامه يې نورې زده کړې د انگلستان پهلندن کې بشپړې کړي دي.
دندې
اوس هم په لندن کې ژوند کوي او له بي بي سي راديو سره په کار بوخت دی.
ادبي کارونه
ايمل پسرلي د ١٩٩٤ کال څخه تر ١٩٩٦ کاله پورې له لندن څخه په پښتو ژبه د ډيوې مياشتنۍ مجله خپروله. هغه ډيرې لنډې کيسې ليکلې او يو ناول او د ډرامو يوه ټولگه يې هم خپره شوې ده.
چاپ شوي آثار
د ده د چاپ شويو کتابونو نومونه په دې ډول دي:
- څلورمه لار - د لنډو کيسو ټولگه
- بې ځالې مرغۀ - ناول
- ډالري معاش - د ډرامو ټولگه
- يو مزل دوه نړۍ - د لنډو کيسو ټولگه