استاد عبدالهادي قريشي

د هېواد لوی سیاستوال او تکړه ليکوال استاد عبدالهادي قريشي د سيدالرحمن قريشي زوی، د حبیب الرحمن (مهدي قريشي) لمسی ده. په ۱۳۲۹ هـ. ش کال د جلال آباد په ښار کې زېږېدلی او پاتې ژوند، ابتدایي زده کړې او تحصیلات يې د لغمان په مرکز کې تر سره کړي دي. ښاغلی استاد چې علمي رتبه لري تر اوسه پورې يې په ملکي، نظامي او د خاتم النبین په پوهنتونونو کې د استاد په صفت دنده تر سره کړې ده. ښاغلی استاد چې تر ۳۱۰ زیاتې آکاډميکې ليکنې لري ډېری يې د (افغانستان د علومو د آکاډمۍ) لخوا په علمي تحقيقي مجلو کې چاپ شوي دي. د ښاغلي استاد زیاتې علمي او اکاډميکې مقالې په پښتو، دري او نورو ژبو په (سيمه اييز مطالعاتو) مجله، د بهرنيو چارو د وزارت په (ستوري) مجله، د (جرګې) په مجله او همدارنګه د (هموطن) په مجلو کې چاپ او نشر ته رسيدلي دي.

ښاغلي استاد د خپل د ژوند په ۲۰ وروستيو کلونو کې تر ۳۰۰۵ علمي، تحقیقي، سياسي، تاريخي، فرهنګي، مطقوي، تحلیلي، ادبي مقالې ليکلي او د هېواد په مشهورو مجلو او روځپاڼو کې چاپ او نشر کړي دي.

ښاغلي قريشي د سیاست تر څنګ په ادبي برخه کې هم زیاته مطالعه لري هماغه ده چې په دې برخه کې هم د نورو برخو په څېر مقالې، شعرونه او داستانونه لري.

ښاغلی قريشي د وطن لپاره دوه ځله زنداني شوی او تر اوسه پورې يې په سیاست او نورو برخو کې تر ۱۵ زیات آثار ليکلي چې له مشهورو څخه يو هم (دستهای مخفي و سیاستهای علني) ده.