سردار حيات الله خان
جنرال سردار حيات الله خان (۲۹ د دېسمبر، ۱۸۸۸ ز. - ۶ د جولای، ۱۹۲۹ ز.) چې لقب يې آزاد الدولة و د امير حبيب الله خان او صندل بېگم زوی و. هغه د خپل پلار او تر هغې وروسته د خپل ورور امير امان الله خان د واکمنۍ په وخت کې د افغانستان د حکومت د يو شمېر وزارتونو په څوکۍ او د کتغن او د کابل ولايتونو والي هم پاتې شوی.
مخينه
سردار حيات الله خان د امير حبيب الله خان او صندل بېگم زوی و. هغه دوه مېرمنې درلودې، لومړنۍ ښځه يې زليخا بېگم لقب يې شاه بوبو و هغه د سردار محمد رفيق خان کشرۍ لور وه او دويمه مېرمن يې يوه چترالۍ ښځه وه. حيات الله خان درې زامن درلودله چې هر يو يې:
- محب الله خان آزاد سراج (د زليخا بېگم زوی)
- برهان الله خان سراج (د زليخا بېگم زوی)
- قدرت الله حضرت سراج (د چترالۍ ښځې زوی)
زده کړې او دندې
نوموړي خپلې لومړنۍ زده کړې د کابل په حبيبيه ښوونځي کې ترسره کړې بيا يې پوځي زده کړې وکړې . تر زده کړو وروسته يې له ۱۹۰۵ ز. - ۱۹۰۷ ز. د کتغن د والي په دوگه دنده ترسره کړې او له ۱۹۱۱ ز. - ۱۹۱۲ز. ، ۱۹۱۲ز. - ۱۹۱۳ ز. او ۱۹۱۳ ز. - ۱۹۱۴ ز. په ژمي کې د کابل ولايت د والي دنده درلوده. له ۱۹۲۳ ز. - ۱۹۲۵ ز. کال پورې د افغانستان د ښوونې او روزنې وزير پاتې شوی. همداراز له ۱۹۲۵ ز. - ۱۹۲۹ ز. کال پورې د افغانستان د عدليې وزير پاتې شوی. په همدې موده کې يې حکومتي لوړه جايزه د لمر اعلی نښان ترلاسه کړ.
مړينه
سردار حيات الله خان په کابل کې په ۶ د جولای ۱۹۲۹ ز. کال کې کله چې حبيب الله کلکاني په واکمنۍ ورسېد، ووژل شو.