د افغانستان د ژباړې او څېړنې مرکز

د افغانستان د ژباړې او څېړنې مرکز يو ټولنيز نادولتي ارگان دى چې د ۱۳۸۹ کال د زمري په پنځمه نېټه د افغانستان د اساسي قانون د درېيمې مادې له مخې له عدليې وزارت سره په (۱۹۸۷) گڼه ثبت شوی دى. د افغانستان د ژباړې او څېړنې مرکز په هېواد کې د ژباړې د تخصصي کولو، د ژباړې له لارې په هېواد کې د وړتياوو د لوړولو او د هېواد د ژبو د بډاينې او د ژباړې په گډون په بېلابېلو برخو کې د څېړنې په سترو او کلي موخو په کابل کې د يوې ځوانې ډلې لخوا جوړ شو. دغې ډلې له ۱۳۸۳ کال راهيسې په بېلابېلو برخو کې د نړۍ له بډايو ژبو څخه د هيواد رسمي ژبو ته گڼ کتابونه، مقالې او بېلابېل توکي ژباړلي چې په پاى كې ورته له حکومت سره په رسمي بڼه د ثبتېدو او رسمي کار زمينه برابره شوه. د افغانستان د ژباړې او څېړنې د مرکز په مشرتابه کې هغه ژورنالستان او ليكوالان کار کوي چې ډېره موده د هېواد په بېلابېلو برخو کې د ټولنې د انځورگرانو په توگه پاتې شوي او د ټولنې له نږدې او کره مطالعې وروسته يې د نادودو د پاى ته رسولو او د سوکالۍ او پرمختگ د غوړېدو په موخه قلم او ټينگ گام اوچت کړى. په مرکز کې د همېشنيو کارکونکو تر څنگ دهېواد پياوړي ليكوالان د ژبو په کتنه او معياري متنونو کې د مرکز کارونه د ځانگړي جوړښت له مخې له نږدې څاري او دا چاره ددې لامل شوې چې د افغانستان د ژباړې او څېړنې مرکز ژباړل شوي توکي په کره او معياري ژبه د هېوادوالو د اړتياوو د پوره کولو لپاره وړاندې کړي. د افغانستان د ژباړې او څېړنې مرکز د ژباړې په گډون په بېلابېلو برخو کې د څېړنې او څېړنيزو رپوټونو د برابرولو، د مقالو د خپرولو، مرکو او سندونو د وړاندې کولو لړۍ هم پيل کړې چې د څېړنو په لاسته راوړنو کې يې په بېلابېلو برخو کې ليکل شوي او ټولنې ته وړاندې شوي کتابونه د يادولو وړ دي. د افغانستان د ژباړې او څېړنې مركز د خپل هغه ځانگړي جوړښت له مخې چې د هېواد شرايطو ته په کتو سره يې رامنځته کړى خپلې چارې په داسې ډول مخ ته وړي چې د هېواد له پياوړو ژباړنانو څخه په داسې توگه کار واخلي چې هغوى هم وکولاى شي له دغه مرکز سره همکاري وکړي چې د مرکز د دغه راز ژباړنانو او ليکوالانو د غړو شمېر لسگونو ته رسېږي.

لرليد

د افغانستان د ژباړې او څېړنې مرکز د هېوادوالو لپاره د بډايو علمي زېرمو شتون، د معياري ژبې وده، د پرمخ يون لپاره د وړتياوو رامنځته کول او په خپلو پښو درېدو ته د هېواد چمتو کول، د مسوليت منونکې واکوالۍ را منځته کېدو ته لاره هوارول، د خپل بډاى کلتور ساتل او د عمومي پوهاوي د کچې لوړوالى د خپلو هيلو په توگه يادوي.

موخې

د افغانستان د ژباړې او څېړنې مرکز په هېواد کې د وړتياوو د روزنې او د عامه پوهاوي لپاره د ژباړې او څېړنې اړتيا ته په کتو سره، د علمي زېرمو بډاينې، د پرمختللې او سوکاله ټولنې په لور گام اوچتولو او نوو تجربو رالېږدولو ته د کار د لومړيتوب په توگه وکتل.
د ژباړې او څېړنې مرکز د ژباړې مهمې علمي او کلتوري برخې ته د پام جلبول او د دې مهمې برخې د اړتيا پر اهميت ټينگار کوي.
مرکز د زده کړه نيزو موسسو لپاره په بېلابېلو برخو کې د نوو او اړينو عملي سرچينو را ژباړل او د مطالعاتو او څېړنې له لارې د دې برخې بډاينې ته ځان ژمن گڼي.
مرکز په هېواد کې د ژباړې د معياري کولو او د دې مهمې څانگې په اړه د تخصصي معلوماتو برابرول او په دې برخه کې د پراخو څېړنو ترسره کول له خپلو سترو موخو بولي.
د افغانستان د ژباړې او څېړنې مرکز د خپلو ژباړو او څېړنو له لارې د علمي او کلتوري بډاينو په موخه د خپرنيو او رسنيو له لارې عمومي پوهاوي ته هم د ورځپاڼې، وېب پاڼې او نورو رسنيو فعالول خپله موخه بولي.
د افغانستان د ژباړې او څېړنې مرکز هڅه کوي چې د هېواد ژبو ته د را ژباړل کېدونکو توکو معيار په چټکه لوړ او اغېز يې زيات کړي.
مرکز نړيوالو ژونديو ژبو ته د افغانستان له رسمي ژبو څخه د افغانانو د هويت، تاريخ، لاسته راوړنو او ژوند په اړه د مهمو کتابونو او توکو ژباړل او د هغوى معرفي کول په چاريزو لومړيتوبونو کې شماري.
مرکز په عمومي سويه په هېواد کې د دولتي او نادولتي ادارو په گډون په کلي ډول هڅه کوي چې ژباړنان وهڅوي او د شونتيا په صورت کې د دوى لپاره غونډې او سيمينارونه پيل کړي.
مرکز غواړي د دولتي او نادولتي څېړنيزو مرکزونو لپاره په بېلابېلو برخو کې د افغانستان د اسلامي جمهوري دولت د قانون په چوکاټ کې معلومات برابر او يا هم وژباړي.
مرکز غواړي په مدرن ډول نوې ډکشنري چمتو او له بېلابېلو لارو د ژباړې د آسانتيا په برخه کې علمي او عملي گامونه اوچت کړي.
د افغانستان د ژباړې او څېړنې مركز په بېلابېلو برخو كې د څېړنو تر څنگ د ټولنيزو خدمتونو د ښه والي او اقتصادي پوهې د لوړولو لپاره هم ځانگړې موخه لري چې په اوږدمهال كې به دا كار په هېواد كې د يوې پياوړې، مشهورې او د اقتصاد په برخه كې د تخصصي ورځپاڼې په بڼه پيل شي.
مرکز په پام کې لري چې د شونتيا په صورت کې د ژباړې په برخه کې د اغېزمنو او تلپاتې خدمتونو په موخه د نيمه لوړو زده کړو يوه موسسه هم په رسمي ډول فعاله او وچلوي.

عمومي ژمنې

په هر ډول حالاتو او هر ډول شونتياوو کې په غوڅنده توگه ټولو اسلامي او ملي پولو ته
د اسلام د مبارک دين په رڼا کې په بېلابېلو برخو کې فکر کولو ته د خلکو د لاسرسي د زمينې برابرولو ته
د ژبنيو او قومي مسايلو او اختلافونو له منځه وړلوته
په بېلابېلو برخو کې په تېره بيا ژباړه کې د وړتياوو لوړولو ته
او د افغانستان د ژباړې او څېړنې د مرکز ټولو په گوته شوو موخو او لرليد ته

جوړښت

د افغانستان د ژباړې او څېړنې مرکز خپلې چارې په دوه ډوله پر مخ وړي، لومړى هغه کارکونکي دي چې يواځې په مرکز کې کار کوي او د مرکز چارې پر مخ وړي. دا کارکونکي د مرکز عمومي مشر، د مرکز اجرايوي مشر، د انگليسي ژبې د ژباړې د څانگې مسول، د عربي ژبې د ژباړې د څانگې مسول، د متن اوډونکي او اېډېټران، د وېب پاڼې مسلکي کارکونکي، راپورټران، ليكوالان او تخنيکي کارکونکي دي. بله ډله هغه ليكوالان او ژباړنان دي چې دوى په مرکز کې د نيم مهاله يا پارټ ټايم په توگه کار کوي، دوى ژباړې او څېړنې په خپل ټاکلي وخت کې له مرکز سره شريکوي، او د مرکز له پياوړي ملاتړ څخه برخمن دي. په ټول هېواد کې غړي او همکار ملگري چې دوى د بېلابيلو موضوعاتو په اړه د ژباړې او څېړنې مرکز ته معلومات را استوي او د مرکز لخوا هم خلکو ته د بېلابيلو شونتياوو له لارې رسول کېږي. د ژباړې او څېړنې مرکز، له عربي ژبې څخه دوه ټول مهاله يا فول ټايم ژباړنان لري او در ى کسان هم د نيم مهالي سيستم له مخې کار کوي. د انگليسي ژبې په برخه کې درى ټول مهاله او پنځه نيم مهاله غړي لري. د څېړنې په برخه کې يو ليکوال ټول مهاله او لس کسان هم په مرکز او ولايتونو کې د نيم مهاله يا غړيتوب له لارې له مرکز سره کار کوي. د ژباړې او څېړنې مرکز اداري، تخنيکي او د ويب پاڼو او خپرنيو په برخه کې هم پوره کارکونکي لري چې چارې يې په منظم ډول له وړاندې د جوړ شوي مهالوېش او موخو سره سمې پرمخ روانې دي.

چاريزې ژمنې

د افغانستان د ژباړې او څېړنې مرکز د هېواد د اسلامي جمهوريت ټول قوانين پرځان مني او ځان ټولو اړوندو قوانينو ته ژمن گڼي او دغه راز د بيان آزادي هم د اسلامي جمهوري دولت په چوکاټ کې خپل حق گڼي. د افغانستان د ژباړې او څېړنې د مرکز ټولې پرېکړې د اجرايوي بورډ په لاس کې دي، د دې تر څنگ تخنيکي، محتوايي او د ارزونې کمېټې د مرکز له مشر سره په توافق کې د پرېکړې خلاص لاس لري چې د دې ډلې ژوندليک، کاري مخينې او تعهد د مرکز له لارې په بېلابېلو رسمي خپرنيزو ارگانونو کې خپاره شوي دي. د افغانستان د ژباړې او څېړنې مرکز د افغانستان د اسلامي جمهوريت د ټولو قوانينو په رعايت او د ژبو د معيارونو په نظر کې نيول او دغه راز د ټولو ليکوالو او علمي شخصيتونو او ارگانونو سپارښتنې له خپلو امکاناتو سره سم پر ځان عملي کول خپل کاري الزام گڼي. د افغانستان د ژباړې او څېړنې مرکز لومړى په کابل کې او بيا په ټولو ولايتونو کې او دغه راز له هېواد څخه بهر خپلې څانگې پرانيزي او د هېواد د خدمت د حق په برخه کې په خپل هوډ ټينگار لري. د افغانستان د ژباړې او څېړنې مرکز د هېواد له مشهورو او تکړه ليکوالو څخه د جوړ شوي بورډ د څېړنو پر اساس خپل کارونه تنظيموي او د هغوى پرېکړې د خپلې موخې په توگه له داخلي مقرراتو سره سم څارلاى شي. د افغانستان د ژباړې او څېړنې مرکز د خپل پايښت او د خپلو کارونو د ښه پرمختگ او لا پراختيا په موخه په بېلابېلو برخو کې د مالي سرچينو پلټنه کوي، د مارکټينگ برخه تر يوه ځانگړي کاري بورډ لاندې د مرکز له قوانينو سره سم له بېلابېلو لورو څخه د ملاتړ د جلب په موخه کار کوي. د افغانستان د ژباړې او څېړنې مرکز د خپلو خپرندويه کارونو د پرمخ بېولو لپاره د خپرنيو او رسنيو ځانگړى بورډ لري چې د مرکز له مشر او اجرايوي بورډ سره په هوكړه په بېلابېلو برخو کې د خپرونو پرېکړې کوي. د افغانستان د ژباړې او څېړنې مرکز ولايتي جوړښتونه او د اړتيا پر مهال نړيوالې چارې او غځونې د اجراييه کمېټې له تصويب وروسته جوړولاى شي.