آلانين

د L-alanine (آلانين) کيميايي جوړښت
آلانين
سيستماتيک (IUPAC) نوم
(S)-2-aminopropanoic acid
پېژندنې
CAS number	56-41-7
PubChem	5950
کيميايي مالومات
فورمول	?
Molar mass	89.1 g/mol
SMILES	C[C@H](N)C(O)=O
بشپړ مالومات

آلانين يا Alanine (لنډون:Ala يا A)^[۱] يو α-امينو اسيد دی چې کيميايي فورمول يې HO₂CCH(NH₂)CH₃ دی. د L-isomer (آيسومر)، د ۲۰ پروټين-جوړونکو امينو اسيدونو څخه يو امينو اسيد دی، په ساده توگه دا د پروټينونو د بنسټي ډبره ده او د دې کوډونونه GCU, GCC, GCA, او GCG دي. دا د يو غېر-قطبي امينو اسيدونو په ټولگي کې شامل دی. L-alanine آلانين د ليوسين نه وروسته په دوهمه کچه کې راځي، همدا ډول اسيد د پروټينو په 1,150 نمونه کې د primary structure يا لومړنۍ بڼې 7.8% برخه جوړوي.^[۲] D-آلانين يواځې د باکټريا په سلولي دېوال کې او ځينو پېپټايډي انټيبيوټيکو کې موندل کېږي.

جوړښت

د آلانين α-کاربون د ميتايل گروپ (-CH₃) سره تړلی دی، چې په همدې توگه آلانين د ماليکيولي جوړښت له مخې تر ټولو يو ساده الفا-امينو اسيد دی او په همدې پايله کې آلانين د آليفاټيک امينو اسيدونو په ټولگي پورې تړل کېږي. د آلانين ميتايل گروپ يو غېر-تعاملي گروپ گڼل کېږي او په مستقيم ډول ّهېڅکله د پروټين په کړنو کې ونډه نه لري.

ژواکي-جوړښت

آلانين په ټولگړي ډول د پيرووېټ اسيد د لږېدونکي امينېشن پروسې په مرسته لاس ته راځي. نو ددې پخاطر چې ټرانس-امينېشن تعاملونه بېرته په شاتلونکي تعاملونه دي او همدا شان پيرووېټ خپرېدونکي هم دي، نو په همدې ترڅ کې آلانين ډېر ژر مېنځ ته راځي او په همدې توگه د ميټابوليکو کړنو لکه گلايکوليسز، گلايکونيوجينېسز او د سټريک اسيد څرخ سره نژدې اړيکې هم لري. دا د لاکټېټ سره يوځای جوړېږي او د پروټين نه گلوکوزونه د آلانين څرخ په مرسته توليدوي.

سرچينې

هر پروټيني خواړه لکه غوښه، کب، هگۍ يا د شودو نه لاس ته راغلي خوړنتوکي، ټول د آلانين نه ډک دي. راسمي آلانين د سټرېکر تعامل په مرسته په آزمېنتون کې د جوړولو وړ دی او دا جوړښت د اسيت-الدهايډ سره د هايډروجن ساينايډ او آمونيا د يوځای کولو وروسته لاس ته راځي.^[۳]

فزيولوژيکي کړنه

د آمونيا او د پيرووېټ د کاربون لرونکي په توگه

د ووبونو (انساج) او ځيگر تر مېنځ د گلوکوز-آلانين په څرخ کې آلانين ډېر اهم رول لري. په عضلاتو او نورو ووبونو کې آلانين د امينو اسيدونو کچه د سونگ توکو لپاره راټيټوي، امينو گروپونه د گلوټامېټ په بڼه د ټرانس-امينېشن پروسې په مرسته راغونډېږي. گلوټامېټ بيا خپل امينو گروپ د آلانين امينوټرانسفېراز په کړنه کې پيرووېټ ته، چې د عضلاتو د گلايکوليسز يو جوړښت دی، ورلېږي، چې بيا وروسته آلانين او الفا-کيټوگلوټارېټ جوړوي. همدا جوړ شوی آلانين وينې ته لار پېدا کوي او په همدې توگه ځيگر ته ورځي. د آلانين امينوټرانسفېراز په شا تلونکی تعامل په ځيگر کې پېښېږي. پيرووېټ اسيد چې د گلوکوز نه د گلايکونيوجينېسز په ذريعه جوړېږي، بېرته عضلاتو ته د دوراني غونډال سره ورگرځي. په ځيگر کې گلوټامېټ مايټوکونډريا ته د ننوتنې وروسته د گلوټامېټ ډيهايډروجينېس په کړنه کې په آمونيم آيون بدلېږي، کوم چې بيا وروسته د يوريا څرخ کې د يوريا په جوړولو کې برخه اخلي.^[۴]

دا د گلوکوزآلانين څرخ دی چې پيرووېټ او گلوټامېټ د عضلاتو نه لرې کوي چې بيا وروسته ځيگر ته خپل لار مومي. گلوکوز دا توان لري چې بېرته د عضلاتو نه راستانه شوي پيرووېټ اسيدو نه جوړ شي. د گلوکونيوجينېسز چې د انرژي جوړولو يو ډول کړنه ده، د عضلاتو په پرتله په ځيگر کې بشپړېږي. په عضلاتو کې ټول شته ATP د عضلاتو د غونجېدو لپاره ځانگړې شوي.^[۴]

سرچینې

↑ IUPAC-IUBMB Joint Commission on Biochemical Nomenclature. "Nomenclature and Symbolism for Amino Acids and Peptides". Recommendations on Organic & Biochemical Nomenclature, Symbols & Terminology etc. بياځلي په 2007-05-17.
↑ Doolittle, R. F.; & Fasman G.D. (ed.) (1989). "Redundancies in protein sequences" in Prediction of Protein Structures and the Principles of Protein Conformation. New York: Plenum Press, pp. 599-623.
↑ Kendall, E. C.; McKenzie, B. F. “dl-Alanine” Organic Syntheses, Collected Volume 1, p.21 (1941).http://www.orgsyn.org/orgsyn/pdfs/CV1P0021.pdf
↑ ^۴٫۰ ^۴٫۱ Nelson, D. L. & Cox, M. M. (2005). د لېهنينگر د ژواکي کيميا اصول, څلورم چاپ. نيويارک: W. H. Freeman and Company, pp. 684-685. ISBN 0-7167-4339-6.

باندنۍ تړنې

د ويکي کمپيوټري کيميا

biochemical families:prot · nucl · carb (glpr, alco, glys) · lipd (fata/i, phld, strd, gllp, eico) · amac/i · ncbs/i · ttpy/i

[1] IUPAC-IUBMB Joint Commission on Biochemical Nomenclature. "Nomenclature and Symbolism for Amino Acids and Peptides". Recommendations on Organic & Biochemical Nomenclature, Symbols & Terminology etc. بياځلي په 2007-05-17.

[2] Doolittle, R. F.; & Fasman G.D. (ed.) (1989). "Redundancies in protein sequences" in Prediction of Protein Structures and the Principles of Protein Conformation. New York: Plenum Press, pp. 599-623.

[3] Kendall, E. C.; McKenzie, B. F. “dl-Alanine” Organic Syntheses, Collected Volume 1, p.21 (1941).http://www.orgsyn.org/orgsyn/pdfs/CV1P0021.pdf

[Nel684-4] ۴٫۰ ^۴٫۱ Nelson, D. L. & Cox, M. M. (2005). د لېهنينگر د ژواکي کيميا اصول, څلورم چاپ. نيويارک: W. H. Freeman and Company, pp. 684-685. ISBN 0-7167-4339-6.

[۱]

[۲]

[۳]

[۴]